Mahugot nga iginmando ni Mayor Alfred Romualdez nga magsul-ot hin face mask an ngatanan nga tawo ha Tacloban City nga magawas ha ira tagsatagsa nga panimalay ha bisan ano nga oras.
Upod hini nga iya kasugu-anan amo an pagdakop ngan pagpaslak ha karsel han hin-o man nga masupak hini. Iya iginsagdon ha publiko nga kun may makit-an nga deri naka face mask nga nagpapasoy-pasoy ha gawas han balay, dayon ini igtawag ha kapulisan o deri ngani ha barangay officials basi dakpon ini.
Dida hin usa nga interview ha iFM-RMN Tacloban kanina han aga, gintagan hin duon ni Romualdez nga napamatud-an na ha iba nga nasud nga epiktibo an pagsul-ot han face mask basi deri na magsinarang an COVID-19. Sering pa han alkalde nga nahabubo an peligro nga makatapon an may sakit kun hiya in naka face mask, ngan mayda liwat proteskyon kontra han virus an may face mask.
Sumala pa han alkalde, waray gamit an restrictive quarantine nga iginpapasunod han City Government kun deri magsusunod ha mga patakaran an publiko. Na-oberbaran man gud nga hadin naglabay nga pira ka adlaw, damo la gihapon an deri nagamit han face mask ngan nagawas pa gud ha ira balay. Didto mismo ha merkado publiko han syudad, may pira pa nga waray face mask ug an iba iginkakab-it la ha talinga ngan deri amo an sakto nga pagsul-ot.
Kadungan hini, nanawagan hi Romualdez ngadto han mga naninigarilyo nga undangon na an ira bisyo labi na yana nga ginhuhulga kita han makamaratay nga kagaw. Sering pa niya an pagpina-ubok-ubok hin sigarilyo in nakakapaluya han resestensya ug nagdudurot hin sakit ha baga. Kun aton manunumduman, kadam-an han mga natatapnan han corona virus in mayda na daan mga respiratory illness upod na an sakit ha baga. #
(Posted 1:26 PM, April 3, 2020)
