An faculty han LNU Science Department samtang naghihimo han disinfectant solution. (Photo by An Lantawan)

Naghimo hin mga pamaagi an Leyte Normal University basi makabulig ha pagsurapo han COVID-19. Ini an iginpasabot ni Dr. Jude Duarte, an University President, han igkahimangraw hiya han isumat.com.

Pira na ka adlaw an nag-agi, an faculty han  LNU Science Department in naghimo hin disinfectant formulation ngan igindistribuer ha magkalainlain nga opisina ngan grupo basi magamit ha pagpugong nga magsarang an virus. An nasabi nga disinfectant in subay han mga guidelines han Department of Health sanglit segurado nga epektibo ini kontra kagaw sumala pa kan Duarte.

An mga grupo ngan ahensya nga natagan na han disinfectant amo an Philippine Nurses Association, Dulag Surf Camp, Mamanua Tribe ha Basey, Samar, Tacloban City Rescue Unit, Civil Service Commission, Department of Budget and management, Commission on Audit, Commission on Higher Education, Commission on Population ngan Brgy San Miguelay ha Sta Rita, Samar.  Nakakarawat gihapon an radio station 99.1 iFM-Tacloban han disinfectant ngan face shields.

Labot la han disinfectant, an mga empleyado han unibersidad in nanhihimo hin mga face masks ngan face shields komo kaparte han tinatawag nga work from home scheme. Nagsumat hi Duarte nga nakahimo na hira hin dos mil nga face mask ngan mil kinyentos nga face shields ngan naihatag na liwat ini ha mga health workers ngan frontline personnel.

Nakatalaan gihapon nga tikangan han LNU an paghimo hin liquid soap nga gagamiton gihapon ha mga hospital ngan frontline desks.

Kasumpay hini, nanawagan an LNU ha bisan hin-o nga karuyag maghatag hin mga materyales ha ira basi makahimo pa hira hin kadugangan nga face masks ngan face shields. Puede gihapon hira maghatag han disinfectant basta magdara la hin surudlan ngadto ha ira.

Iginpasabot gihapon ni Duarte nga naghatag hira hin hinabang nga bugas ha Mamanua Tribe ngan Brgy San Miguelay. An pondo nga iginpalit hini in tikang han Extension Services Program han eskwelahan.

An Dulag Surf Camp in usa han mga kasugbong han LNU hini nga ira mga inisyatibo ngan proyekto komo pagbulig han paningkamot nga deri na maglarab an COVID-19 ha aton dapit. #

(Posted 4:05 AM, April 4, 2020)