Isumat.com/8:28AM, June 4, 2020
Iginmando ni Baybay City Mayor Jose Carlos Cari nga ig-implementar an lockdown ha Brgy Pangasugan dida han nasabi nga syudad. ini nga kamanduan in nahipapatik han Executive Order 68 nga iya pinirmahan kakulop nga adlaw, Hunyo 3, 2020.
Sumala kan Cari, ini nga iya kamanduan in tungod han pagpinasaway hin usa nga Returning Resident nga waray sumunod han guidlines han syudad kasumpay han mga pitad nga hihimoon para han mga nagkakabalik nga Baybayanon tikang ha iba nga lugar.
Dida han impormasyon, ini nga lalaki in umabot ha Baybay City han maagahon han Mayo 23, ug nagderetso ini ha ira balay ha Brgy Pangasugan. Imbes nga magpapasabot hiya ha mga City Officials basi ig-kwarentina anay hiya ha facilidad han gobyerno, lumusot lugod hiya ngan umuli ha iya panimalay.
Hinsabutan pa nga mayda kasabutan an mga opisyal han barangay ug ini nga tawo nga didto la hiya ha balay magka-kwarentina. Sumala kan Cari, deri ini puede nga magsasabot-sabot la an barangay officials ug an mauli nga tawo.
Usa ka semana antis nabisto han City Hall ini nga panhitabo ngan dida la han Lunes, Hunyo 1, 2020 nahapwat ini nga tawo ngan iginbalhin ha Quarantine Center han syudad.
Hinungdan hini, iginpatuman an lockdown dida han nasabi nga barangay tikang kagab-i han alas 9 tobtob hiton Biernes. An 48-oras nga lockdown in gagamiton han mga otoridad basi maghimo hin contact tracing kun hira hin-o pa nga mga tawo an iginka-urusa han Returning Resident labot la han iya pamilya.
Ha ilarum han kamanduaan, ngatanan nga residente han barangay in deri makakagawas han ira balay labot la kun emergency nga sitwasyon. Sarado gihapon an ngatanan nga negosyo ngan mayda liquor ban. Igindederi gihapon para han iba nga tawo an pagsulod ngadto han barangay.
Waray igsumat ni Cari kun tikang diin nga lugar ini nga tawo, pero iya iginbuyagyag nga deri nakooperar tobtob yana ini nga Baybayanon kay deri nagsusumat hin klaro kun hira hin-o an iya mga iginka-urusa tikang han iya pag-abot.
Ginkuhaan na hin swab sample ini nga lalaki ngan naghuhulat han resulta han Confirmatory Test. Igpapa-ilarum gihapon han swabbing an matutudlok nga mga tawo nga iya iginka-urusa.
An Barangay Pangasugan in usa han dagko nga mga barangay ha Baybay. Denhi namumutang an Visayas State University (VSU). 8 kilometros an kahirayo hini nga barangay ha City Proper ngan 35 kilometros an distansya han barangay ngadto ha Ormoc City.
Duha na ka tawo an nagpositibo han virus ha Baybay pero aadto la hira ha Isolation Centers tikang han ira pag-abot. Ini nga duha ka tawo in mga nagkabalik nga OFWs. # (KEVIN SIOSANA)
