Isumat.com/9:01AM, September 06, 2020
Doble an kabido-an yana han prominente ngan poderoso nga pamilya Garcia ha Cebu tungod han magsunod nga kamatay han duha nga ira kabugtu-an.
Temprano pa yana nga aga, Setyembre 6, iginpasamwak han pamilya an pagtalikod ha kadayunan ni Marlon Garcia, an Mayor ha bungto han Barili, Cebu. Usa na ka bulan an nakalabay, nagpositibo hiya han Covid-19. Hiya an ikaduha nga bugto ni Cebu Governor Gwendolyn Garcia nga namatay ha sulod la hin usa ka semana.
Hadin Setyembre 1, hi ex-Mayor Nelson Garcia han Dumanjug, Cebu in binawi-an hin kinabuhi ha Chong Hua Hospital. Waray iginhatag nga detyalye an pamilya kun ano an hinungdan han kamatay han anay alkalde.
Hi Mayor Marlon in nagdaog nga alkalde ha Barili hadton 2016 ngan utro nagdaog dida han 2019.
Ha luyo nga bahin, hi Mayor Nelson in duha ka beses nga alkalde han Dumanjog pero naperde hiya ka congresista dida han 2019 nga piniliay.
An magbugto in kaapi han kilalado nga pamilya Garcia. Hira in mga anak ni anay Cebu Governor Pablo Garcia. An ira bugto nga babaye nga hi Gwendolyn amo an governador han Cebu yana. Bugto gihapon nira hi anay GSIS President Winston Garcia.
Unom na nga mayor ha probinsya han Cebu an nagpositibo han Covid-19. #
