Isumat.com/7:56AM, Pebrero 10, 2021
Sugad-sugad nga nagbag-o na an panlantaw ni Leyte 4th District Rep. Lucy Torres-Gomez ha ideya nga dumalagan pagka-senador han pinili-ay sunod nga tuig.
Kun hadto nga mga panahon, deri hiya naghahatag hin komentaryo ngan iya ginbabaliwaray ini nga ideya, yana nag-iba na an an iya pamulong mahitngod hini nga isyu. Pira pala ka adlaw an nakalabay, hi Torres-Gomez in nag-post ha social media nga abri hiya para hini nga posibilidad. Sumala ha iya, “I am not closing any doors.”
Matuod, ginklaro han magbabalaud nga hapagkayana an sentro han iya atensyon amo an pagserbe han iya distrito nga nakakasakop han Ormoc City, Albuera, Kananga, Merida, Isabel, Palompon ngan Matag-ob. Hiya in aada ha ikatulo ngan katapusan nga termino komo kongresista.
Ha pira nga mga survey, nagawas nga aada hi Torres-Gomez ha Top 6 han mga “senatoriables,” pero mayda liwat mga survey companies nga deri hiya nalalakip ha Magic 12.
Hapagkayana, waray pa pormal nga pahayag an mag-asawa ngahira Ormoc City Mayor Richard Gomez han ira plano ha pulitika para han 2022 Elections. Hi Mayor “Goma” in nagseserbe han iya 2nd term komo alkalde.
Ha luyo nga bahin, an manghod nga bugto han kongresista nga hi Matt Torres amo an mayor yana ha Kananga, Leyte. #
