Isumat.com/7:05PM, May 8, 2020
Pira la ka oras katapos igpasamwak han DOH-Region 8 nga negatibo ha COVID-19 in 60 nga swab samples tikang ha aton rehiyon, ginsundan naman ini hin deri maupay nga notisya kay nadugangan hin lima ka tawo an natapnan han kagaw ha aton dapit.
Dida han gibabag-uhi nga impormasyon tikang han ahensya nga iginpagawas yana nga gab-i, mayda lima ka tawo an bag-o nga positibo han corona virus. Ini nga lima in ngatanan taga-Tarangnan, Samar.
Hinungdan hini, umabot na ha 19 ka tawo an COVID Positive Cases ha Sinirangan Bisayas.
Iginpasabot gihapon han DOH nga negatibo an swab sample ni Tarangnan Mayor Arnel Tan. Manunumduman nga pira na ka adlaw nga naka home isolation an alkalde dara kay iginka-urusa man hiya han iba nga natapnan han virus.
An DOH in waray pa maghatag hin kadugangan nga detalye hini nga mga bag-o nga natapnan, pero ira ginseguro nga magpapasabot hira hin mga impormasyon kasumpay han bag-o nga Positive Cases.
Dida gihapon han latest update han DOH, umabot na ha 856 ka tawo an Suspected Cases ha bug-os nga Rehiyon Otso tobtob yana nga adlaw. # (KEVIN SIOSANA)
