Isumat.com/8:07AM, Pebrero 2, 2021
Deri man hiya dadakpon han mga kapulisan kay an iya bugto man an ginhahalpat, pero umato ini nga lalaki ha mga otoridad ngan namatay dida han engkwentro ha Hernani, E. Samar, Pebrero 1, 2021.
Dida han report han Eastern Samar Provincial PNP Office, an mga tinubyanan han balaud in pumakadto ha panimalay ni Joseph Oprin ha Brgy Canciledes, Hernani basi igserbe an Arrest Warrant nga iginpagawas han TRC-Branch 2 Borongan City tungod hin kaso nga rape.
Ha waray pa kasasabti nga rason, ginpabuthan han bugto ni Joseph nga hi Casiano Oprin an mga kapulisan ngan bumulos pagpabuto an mga otoridad. An suspetsado in naigo ngan gindara ha Our Lady of Gudalupe Hospital ha Gen MacArthur, pero namatay samtang gintatambal.
Nakumpiskar tikang han suspetsado in usa nga 38 nga pistola, home made shotgun, mga bala ngan sundang.
Waray naman madakop an gin-aaresto unta nga hi Joseph ngan padayon ginpipinamiling han kapulisan.
Hadto gihapon nga adlaw, gindakop han mga kapulisan hi Renato Oprin, 52 anyos, residente han Brgy Vigan, Gen MacArthur, Eastern Samar. Ini in tungod han kakumpiskar ha iya panimalay hin kalibre 38, mga bala ngan kalibre 22 Airgun.
Ini nga pitad han kapulisan in nahimugso tungod han search warrant nga ginpalusad han Municipal Circuit Trial Court. An suspetsado in nakapaslak na yana ha karsel ngan maatubang hin kaso kasumpay han Illegal Possession of Firearms and Ammunitions.
Waray liwat mahisumat kun ano an relasyon hini nga suspetsado ngadto han namatay ha Hernani ug an iya bugto nga naka-eskapo. Hira nga tulo in may apelyedo nga Oprin. An Hernani ngan Gen MacArthur in magsapit nga mga bungto. #
