Isumat.com/7:23AM, Pebrero 2, 2021
Binawi-an hin kinabuhi in duha nga empleyado hin Microfinance Agency ngan grabe nga nasamaran an ira ka-trabaho ha aksidente ha kadalanan nga nagdadabi han ira sinasakyan nga motorsiko ngan jeep nga nawarayan preno ha Jiabong, Samar, kakulop Pebrero 1.
Subay han report han Jiabong PNP Office, an mga namatay in ginkilala nga hira Noel Abilar, 28 anyos, waray asawa ngan residente han Brgy Busali, Biliran, Biliran; ug hi Noreen Bongoyan, 22 anyos, waray asawa, ngan nag-uukoy ha Oquendo District, Calbayog City. Nag-antos naman hin mga kasamdan hi Diana Rose Lacasa, waray asawa, taga Naval, Biliran. An tulo nga mga biktima in mga empleyado han ASA Microfinance Foundation.
Ginkilala naman an drayber han jeep nga hi Noriboy Mabilangan, 43 anyos, inasaw-an, ngan nag-uukoy ha Brgy Casandig, Paranas, Samar.
Dida han imbestigasyon, banda alas 2 han kulop, hi Mabilangan in nagmamaneho han jeep dida han national highway ha Brgy Alejendria, Jiabong, Samar. Sakay han jeep in porlomenos siyam ka tawo. Iginsumat ni Mabilangan nga samtang tilusok an iya sarakyan dida han highway, nawarayan ini hin preno.
Tungod han kawaray na kontrol ha manibela, kumilikid an jeep ngan nadat-ugan an motorsiklo nga ira iginkakatapo nga tikadto ha Catbalogan. Sakay han motorsiklo hira Abilar ngan Bongoyan. An usa naman nga motorsiko nga ginmamaneho-an ni Lacasa in bumunggo ngadto han jeep.
Hira Abilar ngan Bongoyan in naawat an kinabuhi, samtang hi Lacasa in gintatambal ha hospital. Na-aresto naman an drayber samtang aada ha maupay nga kahimtang an panlawas han mga pasaheros han jeep.
Duha ka oras antis ini nga aksidente ha Jiabong, nabangga-an hin trak in tulo nga behikulo ha Diversion Road Junction, Maulong, Catbalogan City.
Dida han inisyal nga notisya, usa an namatay nga pito ka tawo an nagkaada hin karamtan ha lawas dida han insidente.
An trak nga kargado hin saging tikang ha General Santos City ngan tikadto unta ha Manila in nawarayan preno samtang nalusok tikang han hitaas nga parte han Diversion Road tikadto han Junction.
Ginpukdol han trak in usa nga pampasahero nga traysikol, motorsiklo ngan pribado nga kotse. Nahisumat nga an namatay in sakay han traysikol.
Nagpahayag an mga residente dida han mao nga lugar, pira na ka beses nga mayda aksidente dida ngan mayda na hadto nagkamamatay ngan nagkaguguba nga balay tungod nga nababanggaan han nawawarayan kontrol nga mga sarakyan nga nalusok dida han tingkuba nga parte han Diversion Road. #
