Isumat.com/5:45AM, Enero 15, 2021
Ginkakabarak-an nga posible mayda nagkatatapnan ha mga nakibulang ha gallera han San Miguel Leyte hadton Enero 10, 2021 tungod kay may pumakadto han bulangan nga nagdadara han kagaw han Covid.
Hinungdan hini, mahugot an panawagan han LGU-San Miguel ngadto han ngatanan nga nakadto han gallera hadto nga adlaw nga mag self isolate hin pira ka adlaw ngan obserbaran an ira panlawas kun may mga sintomas han ginkakahadlukan nga virus.
Iginmando gihapon han LGU nga temporaryo suspenderon an operasyon han mao nga bulangan hin duha ka semana tungod han insidente ngan samtang nagdudumara hin contact tracing.
Sumala han report, an lalaki in ginkuhaan hin swab sample pero sugad-sugad nga waray hiya maghulat han resulta han swab test ngan nakigbulang hiya hadto nga Domingo. Pagka-buwas, gumawas an resulta nga Covid Positive hiya.
Nagsering an LGU nga an nasabi nga lalaki in taga-gawas han bungto. Deri klaro kun ano an karuyatg-sidngon han “taga-gawas”, kun gawas han town proper o deri taga San Miguel, Leyte.
Hadto nga Enero 10, nagkaada hin “Derby” didto han nasabi nga bulangan, sanglit gintotoohan nga damo an nakibulang.
Kadam-an nga katawhan in nagpabati hin kabido han binuhatan hini nga tawo kay aada ha patakaran han DOH nga kun an usa nga tawo ginkuhaan hin swab sample, kinahanglan deri la anay hiya gumawas ha balay o pumakadto hin mga katitirok samtang waray pa resulta an testing han laboratoryo. #
