Nagin tradisyon na para han Lady Huskies han Leyte Normal University an paghakot hin mga pasidungog ha entablado ngan mga kampeonato ha larangan han women’s basketball, ug ini nga mga pagkilala han ira abilidad in pagpamatood nga hira an nagkakapot han trono hini nga sport event ha Sinirangan Visayas.
Dida han nag-agi nga Marso 7, an Lady Huskies an gin ngaranan nga Athletes of the Year (Team Category) dida han kinada tuig nga Dayaw Awards han unibersidad. An Dayaw Awards an ginhahatag han LNU ha magkalainlain nga grupo hin mga estudyante ngan mga empleyado nga nagdara hin dako nga onor ha ira eskwelahan. Ginbubuhat nira ini nga pagpasidungog dungan han ira pagtigaman han Founding Anniversary kun diin yana nga 2020 amo an ira ika-99 nga anibersaryo.
Labot la han yana nga tuig, an Lady Huskies an naka-angkon gihapon hini nga award hadton 2016, 2018 ngan 2019. Ini nga mga kababayen-an nga basketbolista amo an reyna han Region 8 State Colleges and Universities Athletic Association (SCUAA) kun diin ira nakuha an unom ka tuig nga sunod sunod nga titulo tikang han 2014 tobtob 2019. Hinungdan hini, an Lady Huskies an narepresentar han Region 8 ha National SCUAA nga pira na ka beses nga nakakasulod ha championship game kontra National Capital Region (NCR).
Labot la han ira pagigin malinangpuson ha SCUAA Games, damo na gihapon nga titulo an ira nakuha ha iba pa nga nga mga local tournaments ha 5 on 5 ngan 3×3.
Iginkalipay gihapon han team nga an ira Head Coach nga hi Edwin Murillo amo an napili nga Coach of the Year ha Team Event. Ini an ikatulo na ka beses nga nahingadto ha iya ini nga pasidungog. An Lady Huskies in ginkakaptan ni Murillo ug assistant coach Mark Laurente.
Hapagkayana, padayon an pagpakusog han ira line-up para han ti-arabot nga 2020 National SCUAA sugad man para han Regional Games.
Samtang, an javelin thrower nga hi Kim Dancil ug hi Oreste Ortega Jr an nakakuha han Athlete ngan Coach of the year ha Individual Event Category.
An awarding ceremonies an ginpangunahan ni University President Jude Duarte ug iba pa nga higtaas nga opisyal han unibersidad. #
