Nagdudurot yana hin pagkabaraka ha mga residente han Homonhon Island ha Eastern Samar an posibilidad nga umabot ha ira lugar in usa nga barko nga sakay in mga tripulante nga mga Tsino.
Subay han opisyal nga pahayag han St John the Baptist Parish nga namumutang dida han isla, nakakarawat hira hin impormasyon nga mayda cargo ship kun diin upod han mga tripulante in mga Intsik nga nakatalaan umabot ha ira isla tikang Abril 3 tobtob Abril 5, 2020.
Iginsusumat dida hini nga official statement nga ini nga barko in magkakarga hin chromite ores nga produkto han Techiron Mining Company nga may operasyon ha Homonhon.
Nagsering an Paroko nga mahugot nira nga ginbabalabgan ini nga aktibidad dara han peligro nga puede magresulta dara han COVID-19 pandemic nga gin-aatubang yana han publiko. Naghahangyo an Paroko nga himoon nala ini nga loading han produkto kun tapos na ini nga krisis han corona virus.
Kasumpay hini, makusog nga panawagan an iginpadangat han Paroko ngadto han mga natutungdan nga ahensya han gobyerno, labi na an Mines and Geosciences Bureau han DENR ug an Department of Interior and Local Government nga kadagmitan aksyunan ini nga sitwason basi deri mahibutang ha kadelikaduhan an mga residente didto.
An Homonhon Island in kaparte han munisipalidad han Guiuan, ngan may walo nga barangay dida hini nga isla, samtang an Paroko in kaparte han Diocese of Borongan.
Pira na ka beses nga nagin kontrobersyal an mining operations dida hini nga isla dara han mga obserbasyon nga nakakaguba ini han natural resources han lugar. Kasagaran han mga residente didto in aada nakuha han ira pakabuhi ha pagmina.#
(Posted 8:15 AM, April 4, 2020)
