Isumat.com/ Nobyembre 21, 2022
Sobra hin 30 Mil nga katawhan ha Sinirangan Bisayas an nalukba tikang han kakablasan han nag-agi nga tulo ka tuig, subay han gibabag-uhi nga report han National Economic Development Authority (NEDA) Regional Office hadin Nobyembre 18, 2022.
Iginpasamwak ni NEDA Regional Director Meylene Rosalaes nga hadton 2018, an insidente han kapobrehan ha aton rehiyon in 32.7 porsyento, ngan pag-abot han 2021 naghabubo ini ha 28.9 porsyento.
Ini nga mga numero in nagpapakita nga porlomenos 32, 200 nga indibiduwal ha Rehiyon Otso in nakatalwas ha kapobrehan han nakalabay nga tres anyos.
Pero ginklaro ni Rosales nga ini in deri dako nga accomplishment kay waray ngani umabot hin dos porsyento an paghabubo ha poverty incidence. Ini nga numero in waray makatapo han target nga pag-iban han kapobrehan subay han plano han Regional Developoment Plan para han 2017-2022, dugang pa ni Rosales.
Iginrason han opisyal nga deri dako an progreso han rehiyon tungod kay nakabalabag ha pag-ursa han ekonomiya an pandemya han COVID-19.
Mahitungod hini, gintagan hin duon ni Rosales nga kinahangkan magburublig an ngatanan nga sektor ha rehiyon labi na ha mga pitad nga makakaghatag hin darudamo nga oportunidad hin trabaho.
Kinahanglan gihapon nga mapadukwag an sektor han edukasyon han panlawas ngan edukasyon basi magkaada hin igo nga kapas pagsurapo han mga isyu ha ekonomiya. Pinaagi hini, makukumbinser in kadam-an nga mga kapitalista nga magtkod hin negosyo ha Sinirangan Bisayas, sering pa ni Rosales. #
