Isumat.com/8:10AM, May 25, 2020
Imbes nga magpapasunod han maupay nga ginawi-an, nagpinasaway lugod hi kapitan ug an iya tanod, an resulta….nagkadadakop dara han pagpatupada ha ira barangay nga mahugot nga igindederi yana nga panahon han kwarentina.
An mga suspetsado in ginkilala nga hira Jeboy Nobe, 42an anyos nga amo an kapitan han Brgy Socsocon, Pastrana, leyte; an barangay tanod ngahi Joseph Pija, 30 anyos; Nicanor Castillo, 50 anyos; ug hi Arnulfo Pija, 55 anyos.
Subay han report han Pastrana PNP, hi Kap Jeboy amo an gin-aaligar nga nagpasimuno han burublang kay hiya pa gud an “kristo” dida han tupada.
Nakumpiskar han kapulisan an usa nga igburulang nga manok, pusta nga nagkakantidad hin mil dos syentos pesos ug pisaw nga may kahilab-on nga 18 pulgadas.
An mga suspetsado an gindara ha istasyon han pulis ngan nakatalaabn umatubang han kaangayan nga mga kaso.
An pagpatupada o illegal cockfighting in usa han mga aktibidadis nga deri igintutugot yana ha panahon han corona virus pandemic kay deri nasusunod an social distancing, labot la nga waray hini permiso tikang ha munsipyo. # (KEVIN SIOSANA)
