Isumat.com/Hunyo 17, 2021
Abri hi Leyte 1st District Rep ngan Majority Leader Ferdinand Martin Romualdez (FMR) nga dumalagan ka Bise-Presidente han nasud ha eleksyon sunod nga tuig.
Ini an nagin reaksyon ni Roumaldez han pahayag ni Presidente Duterte nga iya susuportaran an magbabalaud han Leyte kun kumandidato ka VP.
Sering ni Romualdez, nalilipay hiya han pahayag ni Duterte ngan antis hiya magdesisyon, maaro hiya hin kasalagdunan tikang han Pangulo.
Sumala han kongresista, hapagkayana iya pa gintitirutimbang an iya plano ha pulitika ngan aminado hiya nga abri an iya huna-huna para han pagka bise-presidente.
Kakulop (Hunyo 17) iginpasamwak ni Duterte nga iya ig-uundong hi Romualdez kun magdesisyon an House Mqajority Leader nga umapi han pa-isan-isan pagka VP hiton eleksyon sunod nga tuig.
Nagsering hi Duterte nga nagsaad na hiya hadto kan FMR nga masuportar kun mag-ambisyon ka bise-presidente. Ini an saad niya durante han mapaso nga lantugi kun hin-o an magigin House Speaker. Hi Romualdez in usa han ginkukunokuno hadto nga magin lider han kongreso, lakip kanda Cong Lord Allan Velasco ngan Cong Allan Peter Cayetano.
Hi Duterte in nagin instrumento basi matapos an dilito ngan nagpa-umaya hi Romualdez nga magin Majority Leader. Dida hini nga insidente, iginsaad ni Duterte nga kun targeton ni FMR an pagka VP, hiya in masuporta han Leyte Congressman.
Hadton 2019, nagsumat gihapon an presidente nga hingyap niya nga ig-recruit hi FMR nga magin kandidato ka VP para han kanan administrasyon partido.
Iginbuyagyag gihapon ni Duterte nga nakakahuna-huna hiya pagdalagan ka Bise-Presidente, pero kun kumandidato hi FMR, deri hiya mapadayon.
