TACLOBAN CITY – Aminado an Muslim Community nga nakabase ha Tacloban nga apektado an ira pag-obserba hin Ramadan kasumpay han natabo nga kasamok ha Marawi City.

Subay ha ekslusibo nga pakipaghimangraw han Bombo Radyo Tacloban kan Ustadz labeeb Abdulrashid, Taga Lanao Del Sur ngan miyembro han Islamic Knowledge of Humanity and Livelihood Association nga nakabase ha Tacloban, nga diri hini mapugngan nga masubo mahitungod nga usa an Marawi City ha lugar nga pinakamarisyo ha kada Ramadan mahitungod nga 90% han mao nga populasyon in mga Muslim.

Man ngani alagid agid nga pasko ha kada Ramadan ha Marawi hilabi pa nga naghahatag ini hin mga regalo ha mga Kablasanon.
Sumentro naman ha pag-aayuno han Muslim an pag-ampo para han Kahimyangan diri la para ha Marawi kundi para tanan nga mga Muslim ha Pilipinas nga apektado han kasamok.

Samtang, mahitungod han Kasamok ha Marawi City, mahugot nga ginkondina han mga ini an ginbubuhat han mga Maute Group.

Sumala kan Ameer Empas, usa pa nga miyembro han IKHLAS- Tacloban nga gingagamit la han mao nga mga rebelde nga grupo an ngaran han Muslim para makakuha hin Simpatiya ha mga katawhan.

Dugang pa hini nga harayo han gintututdo han mga Muslim an ginbubuhat han Maute Group.
Samtang dugang liwat ni Ustadz labeeb Abdulrashid, diri hira maaram kun ano an ginsusunod nga Relihiyon han mga Rebelde nga Maute o diman ngani mga ISIS. (Bombo Radyo Tacloban)