Isumat.com/12:33PM, Enero 12, 2021
Bumalik ha panig han gobyerno in usa nga miembro han Sparrow Unit han New Peoples Army hadin nag-agi nga adlaw pinaagi han iya pagsurender ha kapulisan didto ha Southern Leyte.
Dida han impormasyon nga nahikay han Isumat.com, ginkilala an sumurender nga hi JC Tutor alias Jerwin, 20 anyos, residente han Brgy Tuytatuya, Claver, Surigao City. Hi Tutor in nagsumat ha mga otoridad nga Team Leader hiya han Caloy Platoon, ngan miembro han Sparrow Unit.
Iginsaysay ni Tutor ngadto han mga kapulisan nga an ira grupo nga ginkokomponer hin siyam nga kalalakin-an ngan lima nga kababayen-an in sumakay hin motorboat tikang ha Surigao ngadto ha Southern Leyte han nakalabay nga semana. An lider han ira grupo in ginkilala nga alias Karding.
Pag-abot nira ha Southern Leyte, mayda liwat tumapo ha ira nga pira ka tawo ngan duha nga van an ira ginsakyan. Hi Tutor in nakagdesisyon hin pagbulag han grupo ngan naka-tiempo hiya hin pag-eskapo han umuhi hiya. Hinungdan han iya pakakalagiw, nagka-ada hiya hin tsansa nga sumurender ha PNP Mobile Force Company.
Nagsumat pa hi Tutor nga an ira grupo in may dara nga mga M-16 Baby armalite ngan pistola. Subay han ira plano, an ira grupo in mapakadto ha Samar basi igka-urusa han ira igkasi mga rebelde.
Kun aton manunumduman, pira pala ka semana an nakalabay han magtarhog hi CPP-NPA Chairman Joma Sison nga utro igpapasarang han ira kagiusan nga kumunista an Sparrow Unit. Hadton Dekada 80, ini nga Sparrow Unit an gintudlok nga responsable panmatay hin mga kapulisan, militar, negosyante ngan mga opisyal han gobyerno. #
