Isumat.com/8:09AM, Enero 12, 2021
Nag-antos hin kasamdan ha butkon in usa nga pulis han bun-on hiya han hubog nga suspetsado ha Brgy Casilda, Merida, Leyte hadin nag-agi nga adlaw.
Dida han impormasyon nga nahikay han Isumat.com, an biktima amo hi PCpl Lope Cueva, 32 anyos, ngan nakadestino ha Merida PNP Station. An suspetsado in ginkilala ngahi Benjie Lumbab, 25 anyos, ngan residente han Brgy Nadunghulan, Ormoc City.
Subay han imbestigasyon, samtang nagmamaneho han iya motorsiklo hi Cueva, iya iginkatapo ha kalsada an suspetsado nga nagpipinasaway. Ginda-op han pulis hi Lumbab basi pagsawayon ngan sagdunan, pero tigda bumunlot hin pisaw an suspetsado.
Gin-ikaburuno ha tiyan an pulis, pero iya ini nasagang ngan nasamad hiya ha braso. Kadagmitan naman nga umiskapo hi Lumbab. Nakuha dida han lugar an 14-pulgadas nga pisaw nga gingamit han pagbuno. Hi Cueva in gindara ha Ormoc District Hospital para han pagpatambal.
Ha iba nga panhitabo, usa nga ulitawohay an nag-antos hin igo hin bala han pusilon hin waray hikilal-i nga suspetsado hadton Domingo han gab-i ha Brgy Hamorawon, Calbayog City.
An biktima in ginkilala ngahi Rommel Balentino, 16 anyos, nag-uukoy han nasabi nga barangay. An nagpusil ha iya in angkas hin motor nga umiskapo dayon katapos han panhitabo.
An biktima in gindara ha hospital basi pagtambalon, samtang padayon naman an imbestigasyon han kapulisan han nasabi nga krimen. #
