Isumat.com/11:08PM, May 30, 2020
Duha na ka tawo tikang ha Tanauan, Leyte an nag positibo han corona virus. Ini in sumala han gibabag-uhi nga update nga ginpahayag han DOH-Regional Office.
Dida han advisory han buhatan yana nga gab-i, nagmamalatumat nga usa nga OFW nga babaye nag-eedad hin 30 anyos amo an nag positibo han COVID-19. Sakay hiya han eroplano nga umabot ha Tacloban Airport hadton Mayo 25 nga amo gihapon an ginsakyan han lalaki nga taga Hilongos, Leyte nga natapnan han virus.
Hapagkayana, ini nga babaye in waray iginpapakita nga sintomas han sakit ug aadto ha Municipal Quarantine Facility han bungto. An iya swab sample in gin proseso ha Divine Word Hospital Testing Center.
Hadton Huebes, igin notisya gihapon han DOH an pag positibo han 26 anyos nga lalaki nga taga Tanauan nga naka-uli pinaagi han Balik Probinsya Program. Parehas ini hira aadto yana ha quarantine facility han bungto ngan waray pa hira igka-urusa han ira tagsatagsa pamilya.
Hinungdan hini, 40 na katawo ha Eastern Visayas an nadarahigan han corona virus.
Nagpapadayon an contact tracing han DOH han iba pa nga iginkasakay ha eroplano han taga Hilongos ngan hini nga babaye nga tikang ha Tanauan. # (KEVIN SIOSANA)
