Isumat.com/6:52AM, May 31, 2020

Dara han panuyo nga deri magpa-ilarum hin kwarentina, apektado lugod an bug-os nga sitio kay igin-lockdown an lugar han Local Government Unit ha San Miguel, Leyte.

Tinikangan kakulop, Mayo 30, an Sitio Ogpong ha Brgy Santol an iginpa-ilarum ha Temporary Lockdown ngan magpapabilin hito nga sitwasyon kun deri mag negatibo ha corona virus an swab samples han walo ka tawo nga nagka-abot didto han nasabi nga lugar.

An mga otoridad han LGU ug an pito ka tawo tikang ha Las Pinas in mayda na kasabutan nga magsusunod hira han mga aludayday han bungto. Upod hini an Rapid Testing ha ira pag-abot ug an katorse ka adlaw nga kwarentina ha Municipal Isolation Facility.

Sumala han report han LGU, waray nagin problema han sarabot, sanglit tikang han paglakat ha Las Pinas tobtob han pag-abot ha Samar nagpapadayon an sumpayan samtang nagbibyahe an pito ka tawo. Pero han harani na han San Juanico Bridge, tigda nala nga naparong ngan waray na makokontak an cellphones han grupo.

Dida hini, na-alarma an mga otoridad nga bangin may iba nga plano an grupo, sanglit ira pa ginpahugtan an pagmanman ha checkpoints labi na ha pagsulod han bungto ha Brgy Lukay nga amo an boundary han bungto han Alangalang. Pero iba nga ruta an gin-agi-an han grupo, kay didto hira lumusot ha Babatngon-Pinarigusan-Santol nga kalsada.

Pag-abot ha ira Sitio, mayda ngay-an gin-andam nga payag an ira mga paryente basi didto la hira mag kwarentina. Pero nabisto han mga otoridad nga nakig-urusa an grupo hin panga-on ngan nag-iru-istorya upod an ira mga paryente.

Ginkuha han mga taga LGU an grupo ngan gindara ha Community Isolation Unit upod in tikang ha Scotland nga nakabalik gihapon. Iginpailarum hira hin Rapid Testing ug negatibo an resulta. Buwas, Hunyo 1, kukuhaan hira hin swab samples para han laboratory testing. Samtang ginhuhulat an resulta magpapabilin hira ha facilidad han munsipyo ug padayon an lockdown ha ira sitio.

Sumala han LGU, klaro ini nga pakatalapas han mga guidelines nga iginpapasunod yana nga panahon han corona virus pandemic. Kasumpay hini, utro naghango an LGU ha ira mga residente nga sundon gud an mga patakaran kay namumutang ha peligro an kumunidad kun ginbabaliwaray ini nga mga guidelines. # (KEVIN SIOSANA)

LEAVE A REPLY

Please enter your comment!
Please enter your name here