Isumat.com/1:46PM, August 7, 2020
Patay an anak nga lalaki han anay City Prosecutor han Tacloban han pagpa-arakan hin bala samtang sakay han iya kotse ha Calinipawan District han syudad.
Subay han panguna nga mga impormasyon nga nahikay han Isumat.com, an biktima in nakilal-an nga hi Jason Golong, 43, anyos, may asawa ngan residente han V&G Subdivision, Tacloban.
Banda ala 1 yana nga kulop, samtang nakaparking an iya kotse ha gawas han RTR Hospital, gindaop hiya han suspetdado ngan ginpa-uranan hin bala hinungdan han iya kamatay. Nag-antos hiya hin damo nga igo hin bala ha ulo ngan lawas. Sobra 20 nga basiyo hin bala hin waray pa katudlok nga kalibre hin pusil an nakuha dida han lugar han krimen.
Kadagmitan nga kumalagiw an suspetsado/mga suspetsado katapos han pamusil.
Gim-iimbestigar pa han mga otoridad an posible nga mga anggulo ngan kun-o hin-o an nagpapaluyo han pagpatay.
Hi Jason in anak ni anay Tacloban City Prosecutor Ruperto Golong nga deri pala maiha nagretiro ha serbisyo. #
