Isumat.com/12:23PM, July 5, 2020
Sugad-sugad nga may gin-aandaman nga gyera in usa nga Jailguard ha Northern Samar tungod han iya paghipos hin magkalainlain nga kalibre hin armas de fuego. Ini nga mga pusil nga waray mga lisensya amo an nagin hinungdan nga gindakop hiya han mga tinubyanan han balaud.
Ginkilala an suspetsado nga hi David Tatoy, 49 anyos, nag-uukoy ha Brgy Salvacion, Bobon, Northern Samar. Hi Tatoy in usa nga jailguard nga nakadestino ha Northern Samar Provincial Jail.
Subay han report tikang ha PNP Regional Office, hi Judge Armando Rosadeno han Regional Trial Court ha Allen, Northern Samar in nagpalusad hin search warrant dara han impormasyon nga nahikay han mga kapulisan nga an suspetsado in naghihinipos hin mga pusil.
Sanglit, dida han nakalabay nga adlw, an mga operatiba han CIDG ngan Bobon Police Office in nag-ronda han panimalay ni Tatoy ngan nagkumpiskar didto an mga armas de fuego ngan mga bala.
An mga narekupo tikang han suspetsado amo an masunod: kalibre 45 nga pistola ngan siyam nga mga bala hini; usa nga homemade shotgun; kalibre 38 nga pistola ngan mga bala hin M-16. Nabuksot gihapon nga waray kaangayan nga mga papeles an nasabi nga mga armas.
Waray igpahayag dida han report kun ano an rason han suspetsado nga mayda niya sugad hini nga mga armas ha iya balay. Nakatalaan hiya umatubang han mga kaso nga igsasampa kontra ha iya han mga otoridad. #
