Isumat.com/5:45AM, July 5, 2020
31 nga pasyente han COVID-19 ha Eastern Visayas an bag-o nga nakatalwas tikang han impeksyon han kagaw. Dara hini, umabot na ha 352 an recoveries ngan nagpapabilin naman an tulo ka tawo nga namatay.
Nadugangan naman hin upat ka tawo an natapnan sanglit 581 na an nagpositibo han virus ha bug-os nga rehiyon. Tungod han nagtitikadamo nga recoveries, humitaas ha 60 porsyento an recovery rate ha Region 8.
Dida han mga nagpositibo, 370 an mga Locally Stranded Individuals (LSI), 104 an mga Health Workers ngan 49 an mga OFWs.
An mga bag-o nga nagpositibo amo an masunod: Carigara – 23 anyos nga babaye tikang ha Quezon city; Villaba- 23 anyos nga babaye tikang ha Cebu; Julita- 32 anyos nga babaye tikang ha Manila; ngan Abuyog- 32 anyos nga lalaki tikang ha Cebu.
An mga asymptomatic in aada ha 93 porsyento, mild cases 6 porsyento ngan severe cases 1 porsyento.
Padayon naman an panawagan han DOH Regional Office ngan mga LGUs ha katawhan nga tim-os magsunod han health protocols basi deri matapnan han makamaratay nga kagaw. #
