isumat.com/Hunyo 9, 2023
Arestado an usa nga empleyado han gobyerno dida han anti-illegal drugs operation han mga otoridad ha Brgy 16, Burgos St, Tacloban City, alas 2:16 han maagahon, Hunyo 9, 2023.
Ginkilala an nadakop nga suspek nga hi Mark Stephen Flores, 36 anyos, ulitawo ngan taga Tacloban City. Hiya in gintutudlok nga High Value Individual ngan empleyado ha DENR, sumala han police report.
An nagdumara han operasyon amo an mga personales han Tacloban Police Station 1-Drug Enforcement Unit ha koordinasyon han PDEA Regional Office.
An poseur-buyer nga pulis in nakapalit tikang kan Flores hin usa ka sachet hin gin-aalegar nga shabu. Nakuhaan pa an suspek hin kadugangan nga lima ka sachet han iligal nga droga upod an buy-bust money.
An gin-aalegar nga droga nga narekupo in may timbang nga 2 gramos ngan nagkakantidad hin 10,500 pesos.
Hapagkayana, temporaryo nga iginkarsel an gintatahapan samtang gin-aandam an mga kaso nga igsasalawad kontra ha iya. #
