Isumat.com/7:46AM, Enero 26, 2021
Gin-momonitor gihapon han mga tinubyanan han balaud an iba nga mga unibersidad ngan eskwelahan kasumpay han mga impormasyon nga may natatabo nga pan-recruit han NPA ha mga estudyante.
Ha interview han iFM-RMN Tacloban, hi 8th Infantry Divisiion Chief, Maj General Pio Dinoso III in nagpahayag nga deri la an University of the Philippines an ira gin-momonitor kundi pati gihapon an iba nga eskwelahan.
Sering pa man ni Dinoso nga an terorista nga NPA in magmamalahimo panhugay ngan pangumbinser han mga estudyante ha magkalainlain nga eskwelahan, sanglit deri la an UP an ira ginbabantayan.
Matuod, ginklaro han opisyal nga an recruitment ha iba nga eskwelahan in deri sugad ka “rampant” han natatabo ha UP.
Iginpatapod ni Dinoso nga an militar in duro gihapon an panlimbasog nga kabalabgan ini nga iligal nga aktibidad han kagi-usan kumunismo. Deri matugot an pwersa armada han Pilipinas nga magpadayon an recruitment, pahayag pa han heneral.
Kasumpay hini, nanawagan hi Dinoso ha mga kag-anak nga obserbaran hin hul-os an pang-gawi ngan mga pinulongan han ira mga anak. Kinahanglan deri igbaliwaray han kag-anak kun mayda nira nakikit-an nga pag-iba han batasan han ira mga anak.
Iginbuyagyag han heneral nga kaparte han indoktrinasyon han mga kumunista amo an pagtanom ha utok han mga kabataan nga an tinood nira nga pamilya amo an CPP-NPA ug deri an ira kalugaringon nga pamilya. #
