Mahugot nga pinanhimuwa han Department of Health-Region 8 an nagsarang nga mga hurobhurob nga mayda na upat ka tawo nga positibo han COVID-19 ha Eastern Visayas.
Pira pala ka oras an nakalabay, an ahensya pinaagi kan Regional Director Minerva Molon in nagpagawas hin opisyal nga pahayag agud maklaro ha publiko ini nga isyu. Subay dida han pahayag, nagpapabilin nga usa pala katawo an COVID-19 positive ha Region 8 tobtob alas 9 han aga, yana nga adlaw, Marso 27, 2020.
Ginklaro han DOH nga nagkamay-ada hin “computer glitch” an record han DOH Central Office sanglit nagawas ha Central Office Covid-19 Tracker nga upat na ka tawo an positibo ha Region 8, pero kun ig-click an mapa han rehiyon, malutaw an tinood nga record nga usa la ka tawo an positibo. An DOH personnel nga nagdudumara hini nga tracker ha Central Office an ginmanduan na nga pag-aydon an nahitabo nga systems glitch.
Igindugang pa han DOH nga tobtob yana, waray pa hira makakarawat hin bag-o nga resulta han mga samples nga ira iginpadara ha Research Institute for Tropical Medicine (RITM) kun mayda ba positibo o negatibo han mga pasyente tikang ha Region 8 nga ginkuhaan han samples.
Kasumpay hini, utro nanawagan hi Molon ha publiko nga kun may nagkakagawas nga mga notisya ilabi na ha social media, angay ini beripikaron ha natutungdan o natu-inan nga mga otoridad antis tomood ngan deri ig-share kun waray pa beripikasyon kay nakakagdugang la ini han kahadlok ha katawhan. #
(Posted 12:05PM, March 27, 2020)
