Isumat.com/6:03AM, October 20, 2020
UPDATE: Nadadabi ba ha iligal nga droga an Ex-Army nga pinatay kakulop ha MacArthur, Leyte?
Nalutaw ini nga anggulo subay han pahayag ni MacArthur PNP Chief Capt Dalde, an biktima nga hi Anthony Lou Bugal in na-aresto hadton 2013 tungod han paghidabi han iligal nga droga, pero nakagawas ha karsel hadton 2019 pinaagi han “Plea Bargaining.”
Dida han interview han iFM-RMN Tacloban, nagsering pa hi Dalde nga posible gihapon nga rason nga bangin may iginka-away hi Bugal hadto han nagseserbisyo pa hiya ha AFP. Waray liwat damo nga impormasyon tungod han pagkatawo han biktima tungod kay deri gud hiya tuminongnong nga residente han Javier, Leyte.
Hi Bugal in taga Samar, sering ni Dalde ngan naka-asawa hin taga Javier.
Ha atubangan han patapod han Leyte PNP Provincial Office nga waray na matatabo nga panmatay ha lugar nga ira nasasakupan, mayda na liwat brutal nga panmusil kun diin usa nga anay kaapi han Philippine Army an biktima.
Dida han panguna nga imbestigasyon han MacArthur Leyte PNP, an biktima nga hi Anthony Lou Bugal, may igo nga pangidaron, residente han Brgy Binulho, Javier, Leyte in nagmamaneho han iya tricycle pasado ala 1 han kulop, Oktubre 19.
Han nagsusulsog hiya han kalsada ha Brgy Palali, MacArthur, ginsapitan hiya hin pribado nga behikulo ngan ginpa-uranan hin punglo. Naigo ha magkalainlain nga parte han lawas hi Bugal hinungdan han iya kamatay ha lugar mismo han panhitabo.
Usa naman nga babaye nga iginkatuman nga nagbibisikleta dida han lugar an naigo gihapon hin bala pero iginreport nga talwas na hiya ha peligro.
An mga imbestigador in nakatara hin 17 nga basiyo hin bala hin magkalainlain nga kalibre hin pusil dida han lugar. han krimen.
Kun aton manunumduman, hadton nakalabay nga bulan, hi Leyte PNP Provincial Director Col Rodelio Samson in nagpasasarig nga bubuhaton nira an ngatanan basi waray na matabo nga panmatay ha iya lugar nga nasasakupan.
Iya minanduan an mga hepe han PNP han Leyte nga pahuruhugton pa an seguridad katapos la han sunod-sunod nga ambush ha Palo, Leyte kun diin lima ka tawo an namatay. Mayda mga surok hin impormasyon an nagsering nga nahikakanit ha iligal nga droga an magkasunod nga panmatay ha Palo. #
