Isumat.com/8:32AM, May 27, 2020
Naawat an kinabuhi hin usa nga anay sundalo han pusilon niya an iya kalugaringon katapos han iya pag-ikaparatay han iya ginang-maybahay.
Dida han report han Maasin City PNP, nagkamay-ada hin mapaso nga argumento an mag-asawa ngahira Romeo ngan Teresita Carbonilla didto han ira balay ha Brgy Soro.
Dara han grabe nga ira away, hi Romeo, usa nga ex-army, in napungot na hin duro ngan tigda niya ginkuha an iya armas de fuego ngan pinusil niya an iya misis.
Nakadangat ha kapulisan an impormasyon mahitungod han insidente ngan kadagmitan hira pumakadto han balay han mag-asawa. Han pagdadakpon na unta han mga otoridad hi Romeo, iya pinusil an iya kalugaringon hinungdan han iya kamatay dida mismo han lugar.
Nakatalwas naman hi Teresita nga nadara ha hospital ngan natambal an igo han bala nga iya gin-antos.
Waray mahipatik ha blotter an nagin rason han away han magti-ayon ug kun ano nga klase hin pusil an gingamit dida han krimen. Mayda liwat impormasyon nga hi Romeo in maiha na nga mayda sakit, pero waray liwat hisumat kun ano an iya karamtan ha lawas. # (KEVIN SIOSANA)
