Ginsuspender han Department of Education – Regional Office 8 an Eastern Visayas Athletic Association (EVRAA) Meet nga nakatalaan unta pagbuhaton ha Burauen, Leyte hiton Marso 22 tobtob Marso 28.
Sumala han pahayag han DepED, deri la anay igdadayon dida han nasabi nga mga petsa ini nga murumlay tungod han derektiba han Deped Central Office nga igpapinid la anay an ngatanan nga mga aktibidadis han departamento ha bug-os nga nasud, labi na kun ha gawas ini han eskwelahan pagdudumaraon ngan tatambungan hin kadam-an nga tawo.
Kaparte ini han gios han gobyerno nga masurapo an paglarab han COVID-19 kun diin sobra na 20 ka tawo denhi ha Pilipinas an nag positibo hini nga virus.
Dida han Marso 9, an Marikina City Government in pormal nga nagkanselar han 2020 Palarong Pambansa nga bubuhaton unta ha ira syudad dida hiton Mayo dara na gihapon han posible nga peligro nga igdudurot hini nga sakit.
An DepED Region 8 in waray naman magpahayag kun madadayon pa ba an EVRAA ha iba nga petsa yana nga tuig. An EVRAA Games amo an gidadaku-i nga sporting event ha Sinirangan Visayas para han mga atleta tikang ha elementarya ngan high school.
Antis pa ini nga suspension order han DepED, an mga atleta ha bug-os nga Rehiyon Otso in mahugot na an training para han kompetisyon. An Ormoc City Division amo an back-to-back defending champion han EVRAA.
