Nag-antos hin igo hin bala in usa nga Sangguniang Kabataan (SK) Chairman han pusilon ini ha usa nga lugar didto ha Catubig, N. Samar.
Sumala han inisyal nga imbestigasyon, hi Antonio Caluban, 21 anyos, nga amo an SK chairman han Brgy Sto Tomas, Las Navas, N. Samar an biktima hini nga shooting incident.
Hi Caluban in nagmamaneho han iya motorsiklo han paglanaton hiya hin diri pa kilalado nga suspetsado nga naka motorsiklo gihapon. Pag-abot ha Brgy. Mag-ongon ha bungto han Catubig, didto na hiya ginpusil han gunman.
Kadagmitan nga umiskapo an suspetsado han iya makita nga naigo hin bala an biktima. Hi Caluban in nakapangaro naman hin bulig han mga residente han nasabi nga barangay ngan gindara dayon hiya ha usa nga hospital kun diin nagpapatambal yana hiya.
An mga otoridad in nagpapadayon han imbestigasyon basi masabutan kun hin-o an nagpusil han biktima ug ano an iya motibo. #
