Nahi-ugsod an pagdumara han Season 2 han Eastern Visayas Collegiate Athletic Association (EVCAA) Men’s Basketball Tournament dara han epekto han Corona Virus Disease 2019 ug an nakatalaan nga paghingayad han Tacloban Astrodome.
Sumala kan EVCAA Commissioner Julius Ross Lacaba, kinahanglan igkonsiderar an katalwasan han mga atleta, mga magkirita ug an publiko subay na gihapon han paghangyo han Department of Health nga kun mahihimo diri la anay maghimo o magtambong an katawhan hin dagko nga mga katitirok basi kalikyan an pagsarang han COVID-19. Hinungdan hini, nagdesisyon an EVCAA nga an Season 2 in aabrihan nala hiton Setyembre imbes nga magtitikang na unta adto dida hiton Pebrero 22.
Ha usa nga opisyal nga pahayag, hi Lacaba in nagdugang pa nga labot la han DOH advisory, nakatalaan gihapon nga igpailaum hin paghingayad an mga facilidadis han Astrodome. Kun aton manunumduman, mayda mga parte han Astrodome, labi na an wooden flooring hini amo an nadistroso ni Bagyo Yolanda. Bisan ngani an mga suga ngan sound system in nadarahigan gihapon han super typhoon.
An Tingog Party List nga amo an panguna nga nagpapaluyo han EVCAA amo in naningkamot nga makag-alutaga hin pondo para han major repair han Astrodome ngan titikangan ini nga proyekto ha diri maiha nga panahon. Kasumpay hini, an EVCAA in tim-os nga nagpapasalamat ha mga eskwelahan ngan unibersidad nga nagpakita han ira intensyon nga umapi han Season 2.
Ini amo an Eastern Visayas State University, Leyte Normal University, St Pauls School of Professional Studies, Samar State University, Southern Leyte State University, University of Eastern Philippines, North West Samar State University sugad man an Biliran Province State University.
An EVSU Eagles amo an defending champion hini nga torneo kun diin ira ginperde an SSU dida han best of three finals series han Season 1. Ginlalauman nga mas magigin mahugot iton mga mulay ha masunod nga season dara han pagpakurukusog han mga line-up han iba nga teams. # (KEVIN SIOSANA)
