Isumat.com/1:24PM, August 6, 2020
Kumpirmado nga may natabo nga Local Transmission han COVID-19 ha Basey, Samar kun diin duha nga miembro hin usa nga pamilya an natapnan han virus.
Hadin Agosto 4, nahi-report nga positibo han virus an masinakitnon nga tatay ug hiya in waray travel history. Nagpapabilin nga dako nga paki-ana kun hin-o o diin hiya katapni han kagaw. Kakulop, Agosto 5, iginpasamwak han LGU-Basey nga positibo gihapon han Covid an iya anak nga 37-anyos.
An tatay in nagpa-kunsulta anay ha Basey District Hospital (BDH) tungod han iya sakit ha kasingkasing ngan pulmunya antis hiya ig-swab test ha EVRMC. Dara hini, 31 nga personales han BDH an ginkuhaan hin swab samples. Didto naman ha Brgy Villa Aurora kun diin nag-uukoy an magtala-amay, 17 nga ira closed contacts an gin swab test. An mga resulta han testing in ginpapamulat yana han LGU.
Ha luyo nga bahin, usa naman nga health worker ha Gandara, Samar an nagpositibo han kagaw. Tungod hini, ginpasadhan an Rural Health Unit han bungto basi maghimo hin disinfection.
An babaye nga taga Basey ug Health Worker nga nag-uukoy ha Gandara in lakip han bag-o nga 47 nga kaso ha Sinirangan Bisayas nga nahipatik kakulop, Agosto 5. Tungod hini, umabot na ha 1,083 an natapnan han virus ngan 743 (68%) an naka-recover ha bug-os nga rehiyon. Aada naman ha 337 an Active Cases hapagkayana, subay han report han DOH Regional Office.
An iba nga nagkatatapnan in duha nga Locally Stranded Individuals ha Gandara ngan upat nga LSI nga umabot ha Sta Margarita, Samar. Mayda gihapon tulo nga LSI an natapnan ha Villareal, Samar.
Ha probinsya han Leyte, unom nga LSI an bag-o nga pasyente ha Javier; upat nga LSI nga residente han Carigara; tulo nga LSI ha Palo; duha nga LSI ha Babatngon; ngan tag-urusa nga LSI nga mga residente han Hindang, Burauen, Kananga, Abuyog ngan Alangalang.
Usa nga OFW tikang ha Italya ngan lima nga LSI an bag-o nga mga pasyente ha Ormoc City ngan usa nga LSI tikang ha Makati an natapnan ha syudad han Tacloban.
Siyam nga bag-o nga kaso an nahirecord ha probinsya han Biliran ug ngatanan hira mga LSI tikang ha magkalainlain nga lugar ha Metro Manila ngan Laguna. Tag-tulo an pasyente ha Caibiran ngan Biliran; samtang tag-urusa naman ha Naval, Almeria ngan Kawayan. #
