Isumat.com/7:46AM, August 31, 2020
Ha padayon nga paghataas han ihap han mga nagkakatatapnan han Covid-19 ha Eastern Visayas, nadudugangan man liwat an mga pasyente nga namamatay.
Dida han report han DOH iginpagawas Agosto 30, umabot na 2,952 an na-igo han kagaw han madugangan ini hin 21 nga kaso kakulop. Iginsumat gihapon han DOH an bag-o nga tulo nga namatay sanglit aada na 23 nga Covid Patients an tumalikod ha kadayunan.
An DOH in nagpasamwak gihapon nga 1,638 (54%) an naka talwas tikang han impeksyon han virus. Hapagkayana, aada ha 1,292 an Active Cases. Dida han mga nag positibo, 295 an mga Health Personnel.
Dida han 21 nga natapnan kakulop, 8 ha ira an mga residente han Tacloban. An upat in kumpirmado nga iginka-urusa hin mga nagpositibo han kagaw, samtang waray pa impormasyon tikang ha City Health Office mahitungod han upat nga iba. Umabot na ha 426 an nagkatatapnan nga Taclobanon ngan sobra 300 an Active Cases yana.
Upat nga close contacts hin positibo nga pasyente an nahilista ha Palo, samtang tulo gihapon nga close contacts an natapnan ha Tanauan.
An nagpositibo ha Tolosa in LSI tikang ha Las Pinas, samtang LSI gihapon tikang ha Quezon City an bag-o nga pasyente ha Burauen. An lalaki nga nadarahigan ha Alangalang in usa nga parapanukot hin Lending Company ha Tacloban.
Mayda usa nga bag-o nga pasyente ha Biliran pero adto hiya ha Tacloban nagtatrabaho hin pribado nga hospital.
An bug-os nga rehiyon in iginbalik ha General Community Quarantine tikang ha Modified GCQ ngan epektibo ini tobtob Setyembre 11, 2020. ##
