Isumat.com/1:02PM, October 7, 2020
Paghagos hin duha ka adlaw nga kawara tikang lumakat ha ira balay, natad-an nga patay na an usa nga estudyante ha kolehiyo ha Can-avid, Eastern Samar.
Subay han impormasyon tikang han PNP Office han nasabi nga bungto, ginkilala an biktima nga hin Vince Jerome Castillo, 19-anyos, ngan residente ha Brgy 2 han mao nga bungto.
Nalutaw dida han imbestigasyon, hadton Uktubre 5, lumakat ha ira balay hi Castillo ngan waray na bumalik. Ginpinamiling hiya han iya pamilya, kaurupdan ngan mga kabarangay pero waray matad-i. Kanina han aga, nadiskubre ha sementeryo han bungto an patay nga lawas han biktima.
Mayda igo hin bala hi Castillo ngan natad-an an gintotoohan nga gingamit niya nga pusil dida han lugar han panhitabo. Mayda mga impormasyon nga an armas in gintatag-iyahan ni iya lolo.
Tobtob yana nag-iimbestigar pa an kapulisan han motibo han pagpakamatay ni Castillo. Hadto nga iya paglakat ha ira balay, nagsering hiya nga mapakadto hiya ha eskwelahan. #
