Isumat.com/6:58AM, September 24, 2020
Ha pira na ka tuig o dekada nga naglabay, sugad-sugad nga deri nahugpoy an insidente hin panmatay ha Calbayog City, Samar.
Kakulop, Setyembre 23, namatay an usa nga empleyado han City Government ngan nasamad an iya umangkon han panmusilon hira hin waray panhikilal-i nga suspetsado. An namatay in ginkilala nga hi Orlan Quilantang, 51 anyos, inasaw-an, residente han Brgy Balud nga nagtatrabaho ha City Hall.
Nasamad tungod han igo hin bala an 17-anyos nga umangkon ni Orlan ngan yana gintatambal ha hospital.
An duha nga biktima in sakay han multicab nga ginmamanihu-an ni Quilantang han tigda la may umulpot nga motorsiklo luran in duha ka tawo. An naka-angkas han motorsiklo in humaw-as ngan ginratratan hin bala an mga biktima. Kadagmitan naman nga umiskapo an mga suspetsado katapos han panmusil.
Pira pala ka adlaw an nakalabay, usa nga lalaki nga nagbabaktas la ha Magsaysay St, Calbayog an ginpa-arakan hin punglo hin mga suspetsado ngan namatay gihapon ini.
Tobtob yana, ini nga mga panhitabo in gin-iimbestigar pa han mga tinubyanan han balaud.#
