Iginpatapod han Departamento han Agrikultura ha Rehiyon Otso nga nagpapabilin nga talwas an aton lugar han African Swine Flu (ASF) nga nakakadistroso na yana han industriya han baboy ha iba nga parte han nasud.
Nagpahayag hi Brenda Pepito, Regulatory Division Chief han DA-Region 8, nga tobtob yana waray pa kaso hin ASF denhi ha rehiyon ngan mahugot an ira gin-implementar nga travel ban hin baboy ngan meat products tikang han mga lugar nga gintutuohan nga mayda hini nga sakit. An mga entry points ha Sinirangan Visayas in istrikto an monitoring basi kapugngan an pakasulod hini nga produkto tikang han apektado nga mga lugar ha Luzon ngan Mindanao.
Mayda man gud nagkagawas nga report nga an Bohol in nagpa plano nga magpatuman hin pagderi han mga baboy o prudukto hini tikang ha Region 8 nga makasulod hito nga probinsya, pero nagtotoo an DA ha aton dapit nga waray angay ikabaraka an iba nga lugar kasumpay han aton hog industry.
Labot la han paniguro han DA, an mga lalawigan han Northern Samar, Eastern Samar ngan Southern Leyte in nagpadulot na han ira tagsatagsa nga travel ban ilabi na nga namumutang hini nga mga lugar an entry points tikang ha Luzon ngan Mindanao.
Dida han personal nga pagsudoy sudoy han isumat.com ha pira nga merkado ha Tacloban City, na obserbaran nga mayda paghitaas han presyo kay sugad sugad nga nagkulang hin supply tikang ha Mindanao, ngan pira liwat nga mga konsumidor in na reklamo nga deri parehas an kalidad han karne nga baboy denhi ha aton dapit kun igtatanding han tikang ha Mindanao.
