Isumat.com/Hulyo 3, 2023
Nadiskubre an mga patay nga lawas hin duha nga kalalakin-an ha magkalain nga lugar ha Sinirangan Bisayas hadton Hulyo 1, 2023.
Ha report han PNP Regional Office, an mga biktima in ginkilala nga hira Armando Yara, 69 anyos, parag-uma ngan nag-uukoy ha Brgy Tabunok, Isabel, Leyte; ngan hi Wilmer Acid, 34 anyos, ulitawo, construction workers ngan residente ha Zone 2, brgy Arado, Palo, Leyte.
Ha inisyal nga imbestigasyon, hi Yare in nag-antos hin kasamdan ha luyo nga parte han ulo ngan waray pa katutudlok kun ano nga butang an nakasamad ha iya.
Pasado alas otso han aga, an biktima in pumakadto han iya hagna basi manubong han iya kaayaman ngan kamanukan. Paghagos hin sobra usa ka oras, an iya anak nga hi Cresente John Yara in lumanat ha iya ngadto han lugar ngan nakit-an nga nahuyatang an iya amay.
Kadagmitan ini nga iginreport ha Isabel PNP Office ug an biktima in kadagmitan gindara ha hospital pero igindeklarar nga dead on arrival.
Nag-iimbestigar pa an kapulisan basi masabtan an insakto nga panhitabo labi na an anggulo kun may naghimo hin krimen kontra han biktima.
Hadton pasado alas 9 han gab-i hadto nga petsa, nadiskubre naman an patay nga lawas ni Acid ha sulod han iya panimalay ha Brgy Arado, Palo.
Ha inisyal nga imbestigasyon, hadton Hunyo 30 han gab-i, umuli an biktima ngan nanlaba, pero waray na gumawas tobtob han kinabuwasan.
An testigo in nagtinoktokon ha porta han balay kay maghahatod hin pagkaon, pero waray nabaton, sanglit iya gin-abrihan an portahan ngan nakit-an hi Yare nga sugadsugad nga patay na.
Ginpanginano ini han doktor han RHU ngan nakumpirmar nga waray na kinabuhi.
An kapulisan in nagpahayag nga waray nira nakikita nga mayda iba nga tawo nga pwersado nga sumulod han balay kay waray man distroso ha mga bintana ngan portahan. #
