Isumat.com/8:40AM, May 7, 2020
Nagtitikadamo an mga tawo nga naka kwarentina ha Tarangnan, Samar. Dida han bag-o nga impormasyon tikang didto, duha nga frontliners an ginkuhaan hin swab samples basi igpailarum ha confirmatory test.
Ini nga duha nga personales in nag positibo ha Rapid Anti-Body-Based Diagnostic Test o RDTs. Kasumpay hini, naka-isolate o iginbulag na hira ha iba nga mulopyo. Lakip ini hira han kadam-an nga ginkuhaan hin swab samples dida han nasabi nga bungto.
Dara hini, igpapailarum liwat ha testing an mga ka-urusa han duha han ira trabaho ha frontline basi maseguro kun natapnan ba hira han corona virus.
Ginkaklaro naman han DOH nga an mga positibo an resulta ha Rapid Test in deri conclusive, bootsidngon deri ini segurado o kumpirmado nga positibo na an tawo ha COVID-19. An Rapid Test in nagtutudlok la han presensya han anti-bodies, sanglit gingagamit la ini kun may sintomas an tawo. Deri ini puede gamiton basi makumpirmar an corona virus ha lawas han tawo, pahayag pa han DOH.
Para makumpirmar kun positibo ha COVID-19, an swab sample hin usa nga tawo amo in igpapailarum han Real Time reverse transcription-Polymerase Chain Reaction (real time-RT-PCR) nga amo an proseso yana kun diin an sample in iginpapadara ha Vicente Sotto Memorial Medical Center ha Cebu.
Ha luyo nga bahin, nagpasalamat naman hi Tarangnan Mayor Arnel Tan han kadugangan nga mga tropa tikang ha PNP, AFP, BFP ngan Philippine Coastguard nga nagkaabot ha ira bungto basi lumiwan anay han ira mga frontliners. Sering pa ni Tan, kinahanglan makapahuway anay adton naha-una nga mga personales kay ginkapoy na hin duro ug an iba nag kwarentina na dara han exposure ha mga nag positibo han virus.
Nagpahayag gihapon an alkalde nga an mga bag-o nga personales nga nagka-abot in deri liwat makakagawas ha ira bungto kun deri umagi han insakto nga proseso sugad han isolation hin porlomenos duha ka semana.
Nanawagan naman hi Mayor Tan ha mga grupo o indibiduwal nga karuyag maghatag hin hinabang ha ira nga deri mag deretso ha ira bungto, lugod ighatag an relief goods ngadto ha kapitolyo ha Catbalogan kay an mga otorisado la nga personales an puede pumakadto ha Tarangnan ha pagdul-ong han ayuda. # (KEVIN SIOSANA)
