Isumat.com/7:35AM, Enero 18, 2021
Malinangpuson nga nasikop han mga otoridad an duha nga illegal drugs suspects ha magkalain nga operasyon ha Tacloban City ngan Hilongos, Leyte.
Ha koordinasyon han PDEA Regional Office, an mga operatiba han Tacloban PNP Anti-Drug Unit in naka-aresto kan Anthony Pulga, 37 anyos, inasaw-an, ngan residente ha Brgy 97, Cabalawan. Gindumara an operasyon pasado alas 6 han gab-i, Enero 17, 2021.
An buy-bust operation in gindumara didto han nasabi nga lugar kun diin nakakumpiskar an mga kapulisan hin 17 ka sachet hin gin-aalegar nga shabu nagkakantidad hin 50 Mil pesos.
Ha luyo nga bahin, nasikmit naman an suspetsado nga hi Emerito Zarco alias Titong ha Brgy Himo-aw, Hilongos, alas 7 han gab-i hadton Enero 16.
An mga elemento han PDEA, Leyte PPO ngan Hilongos PNP an nagdumara han buy-bust operation kun diin nakuha tikang kan Zarco in unom ka sachet hin gintotoohan nga shabu balor hin 11 Mil pesos.
An duha nga suspetsado in nakadetener yana ha karsel ngan nakatalaan umatubang han mga kaso nga iginsampa kontra ha ira. #
