Isumat.com/7:18AM, Enero 18, 2021

Mayda na liwat insidente hin panmatay ha Calbayog City ngan an gibabag-uhi nga biktima in usa nga lalaki ngan sugad han naha-una nga mga panhitabo, waray gihapon makilal-i ngan madakop an mga suspetsado.

Dida han impormasyon nga nahikay han Isumat.com, an biktima in ginkilala nga hi Jaspher Pacuhan, 44 anyos, waray trabaho ngan nag-uukoy ha Phase 2, Brgy Rawis, Calbayog. Waray naman hikilal-i an mga suspetsado nga sakay hin itom nga Mitsubishi Adventure.

Sumala han imbestigasyon, hi Pacuhan in mag-aabri na unta han gate han ira balay alas 10 han aga, Enero 17, han tigda la may humaw-as nga lalaki tikang han Mitsubishi ngan dayon ginparatratan hin bala an biktima hinungdan han iya kamatay.

Kadagmitan naman kumalagiw an suspetsado ngan tobtob yana ginhahalpat han mga otoridad basi makilal-an ini ngan matudlok an motibo han krimen.

Ini an ikatulo nga panmatay ha Calbayog tikang han pagtapo han 2021. Han una nga tuig, haros kada bulan mayda gihapon pinapatay didto han syudad ngan kasagaran hini in deri nasasabtan an nagbuhat ug an rason han pagpatay. #