Isumat.com/Oktubre 28, 2022
“An akon liderato in deri pagpasalida han kapasidad hin nag-uusa-an la nga tawo, lugod an akon pamunuan in paghangkop ha ngatanan basi magin kasagabay ha panlimbasog nga umuswag pa an kalidad han eskwelahan ngan komunidad.”
Ini an gintagan hin duon ni Dr Clemelle Montallana dida han iya pamulong ha seremonyas kasumpay han Investiture ha iya komo bag-o nga presidente han Abuyog Community College ha Abuyog Mini-Gym, Oktubre 27, 2022.
Sumala kan Montallana, deri “one-man show” an matatabo ha iya pamunuan, kundi ini in magigin “inclusive” para han ngatanan nga nadadabi han pagdumara han eskwelahan. Sering pa niya, tim-os an iya kumpiyansa ha kapas han mga opisyales, personales, ngan mga estudyante han ACC sanglit magbuburublig an ngatanan para han pagpa-ursa han nasabi nga institusyon.
Iginsaad ni Montallana nga ha iya liderato tatalinguha-on niya nga makab-utan han mga estudyante an hiru-hitaas nga pantag han kinaadman, ug an mga magturutdo in marerekognisar an ira paniguro ha pagtutdo.
Iya gihapon ginpasalamatan an LGU-Abuyog ha panguna ni Mayor Octavio Traya tungod han waray kabudlay nga pagsuporta ha eskwelahan, sugad man an iginhatag ha iya nga pagtapod han Board of Trustees han pagpili-a ha iya komo ACC President.
Hi Montallana in nanumpa ha iya katungdanan ha atubangan ni Maximo Aljibe, Regional Director han Commission on Higher Education ha Eastern Visayas.
Lakip han mga personalidad nga nagtambong han okasyon amo hira Leyte Board Member Carlo Loreto, Abuyog Vice Mayor Lemuel Gin Traya, Atty Raymond Acol nga amo an tinaglwas ni Gobernador Icot Petilla, mga konsehales han bungto, mga opsialyaes ngan personales han ACC sugad man mga estudyante.
Presente gihapon an pamilya han bag-o nga ACC Presidente ha panguna han iya ginang-maybahay Marjorie, iya nanay Mildred, mga anak, ngan mga paryentes; sugad man gihapon mga ka-urusa ha fraternity, organisasyon ngan iba pa nga apiki ha iya kasingkasing.
Hi Montallana an mag-gigiya han ACC nga mayda sobra usa ka gatos nga personales ngan sobra singko mil nga mga estudyante.#
