Ha atubangan han peligro nga posible igdurot han COVID-19, an mga natu-inan nga mga personales han Department of Health-Eastern Visayas in nagpadayon han panmakuna ngadto han mga mulopyo han rehiyon.
An mga health personnel in nagsusudoy-sudoy ha magkalain-lain nga mga bungto ha Eastern Visayas ug an iba in nagbabalay-balay pa ngani ha mga barangay basi mabakunahan an mga nagkikinahanglan nga mga residente.
Nagpapabilin liwat nga matatagamtaman ha mga hospital ngan mga clinics an bakuna para han publiko.
Sumala han DOH, an immunization amo in importante hin duro nga serbisyo han ira ahensya basi kapudngan an iba-iba nga mga sakit nga tinatawag nga vaccine preventable diseases (PVD). Kinahanglan nga mabakunahan an katawhan para deri magtikadamo an magkakasasakit. Kun deri damo an magsakit, deri liwat damo an mapakadto ha hospital ngan amo ini an ginhihingita nga kahimtang kay yana dako an responsibilidad nga gin-aatubang han health department dara han COVID-19 pandemic.
Dara hini, hul-os an pagpasalamat han DOH ha ira mga personales nga nagdudumara han panmakuna para maseguro an mahimsog nga panlawas han publiko, bisan pa man kun namimintana an kadelikaduhan han corona virus ha ira mga aktibidadis. #
(Posted 12:30 PM, April 14, 2020)
