Isumat.com/Mayo 8, 2023
Nag-aaro hin hustisya an tagsatagsa nga pamilya ngan mga ka-urupdan han duha nga kalalakin-an nga naawat an kinabuhi han nahireport nga engkwentro ha butnga han PNP-Special Action Force ngan gin-aalegar nga mga kaapi han New Peoples Army hadton Mayo 5, 2023 ha Brgy Capacuhan, Palapag, N. Samar.
An mga kaparyentehan nira Joel Recare ngan Oscar Alastoy in nagdig-on nga deri mga miembro han mga rebelde nga kumunista an duha nga nagkamamatay.
Kun manunumduman, iginreport nga nagkaada hin asdangay ha butnga han PNP-SAF ngan mga rebelde ha Sitio Ibaliw han nasabi nga lugar kun diin namatay in duha nga kaapi han kagi-usan kumunista.
Sumala han pamilya nira Recare ngan Alastoy, nagtatrabaho nga chainsaw operator helper an duha ngan iginkatuman la hira ha lugar han panhitabo.
Igin-asoy gihapon han Punong Barangay nga waray negatibo nga record ngan waray ha watchlist han barangay an mga ngaran nira Recare ngan Alastoy.
Nagrereklamo gihapon an mga paryente kun kay-ano nga waray pagdad-a dayon ha Rural Health Unit an mga biktima ngan humagos pa in sobra 24 oras antis nadara ha RHU an patay nga lawas han duha nga kalalakin-an.
An IsumatNews in nakakarawat hin impormasyon nga yana nga adlaw, Mayo 8, 2023, an panig han gobyerno in magpapagawas hin opisyal nga pahayag kasumpay hini nga insidente. # (with report from Northern Samar News & Information)
