Isumat.com/8:15AM,June 26, 2020
Pag-iimbestigaron han LGU-Sogod, Southern Leyte an insidente ha ira lugar kun diin nakagawas ha Quarantine Unit in usa nga COVID Positive nga tawo.
Hi Mayor Imelda Tan an nagsumat nga kakulop (Hunyo 25), ini nga lalaki in nakagawas tikang dida han facilidad ngan iginka-urusa hin pira nga mulopyo. Karuyag hisabutan ni Tan kun hin-o an tumugot nga makagawas ini nga Locally Stranded Individual (LSI).
Ha bungto han Sogod, 21 ka adlaw an kwarentina han mga nagkakauli tikang ha iba nga lugar. Kakulop, nakumpleto hini nga LSI an quarantine period, pero waray pa go-signal nga puede na hiya gumawas. Nalutaw ha inisyal nga impormasyon nga nakagawas hiya tungod kay tulo na hiya ka semana nga kwarentina ngan waray man sintomas han virus nga iya gin-aabat.
Sumala han report, ini nga tawo in ginkuhaan hin swab sample ngan iginpadara ha Regional Testing Center an sample hadton Hunyo 18. Kasering seguro han LSI nga negatibo an resulta kay madugay naman ngan maupay man an iya panlawas.
Pero kagab-i, gumawas an resulta nga positibo hiya han virus upod in siyam pa nga iba nga residente han bungto. Kadagmitan pinanmiling ini nga LSI ngan iginkadto ha Isolation Facility. Dara hini, nagmando hin istrikto nga kwarentina hi Mayor Tan ha tulo nga mga barangay han bungto kun diin may posibilidad nga may mga residente didto nga iginka-urusa hini nga LSI, sanglit maghihimo yana hin contact tracing.
May nasagap nga impormasyon an Isumat.com nga ini nga lalaki in nakig-irignom na han iya mga kasangkayan ngan kakilala han iya pakagawas.
Hapagkayana, an Sogod in mayda napulo nga natapnan han virus. Maabot hin 200 nga LSI an aadto yana ha ira Quarantine Unit. Mayda pa hira ginhuhulat nga resulta hin 34 nga swab samples tikang ha Regional Testing Center. # (KEVIN SIOSANA)
