Isumat.com/3:47AM, August 5, 2020
Naghihimo yana hin mahugot nga contact tracing ngan imbestigasyon an mga otoridad ha panlawas basi masabtan kun ano an rason nga natapnan han COVID-19 an pasyente nga taga Calbayog City nga tumalikod hin kadayunan. Waray igpahayag han LGU kun Locally Stranded Individual o Returning OFW an namatay sanglit dako yana nga paki-ana kun paunan-o hiya natapnan han kagaw.
Subay han pahayag han LGU-Calbayog City, namatay dida han Agosto 3, 2020 an 14-anyos nga babaye samtang naka-confine ha Eastern Visayas Regional Medical Center.
Hiya in residente han Brgy San Policarpo ngan gin-admit hin usa nga hospital ha Calbayog hadton Hulyo 25 dara hin ubo, hiranat ngan pagsinuka. Bisan kun deri pa hiya gintutugutan nga gumawas, nagpa-discharge hiya katapos hin usa ka semana ngan umuli ha ira. Pero naghimakuri an iya pag-ginhawa ngan nagpa-admit na liwat ha iba nga hospital ha Calbayog. Pagkabuwas iginbalhin hiya ha EVRMC ngan dida han Agosto 3, binawi-an hiya hin kinabuhi.
Gindumara an panguna nga imbestigasyon ngan naka-isolate na yana an iya close contacts. Naghihikay pa hin kadugangan nga ebidensya an mga otiridad antis hira magpahayag kun ini in matatawag nga local transmission.
Samtang, balik na liwat ha pagigin COVID-Free an Eastern Samar dara kay negatibo an resulta han utro nga swab test han babaye nga nag positibo hanhadi nga taga Lawaan. Negatibo gihapon an resulta han duha nga iya kaupod ha balay. Pero ginklaro han LGU nga magpapa-ilarum pa hira hin duha ka semana nga kwarentina.
Igindugang pa han LGU nga mayda pa ginhuhulat nga resulta han confirmatory test han pira ka tawo nga iginkahibalag han babaye.
Tobtob yana, waray pa hisabuti kun ano an kawsa nga nagpositibo man ini nga babaye kay hadton Marso pa man hiya umabot ngadto ha Lawaan tikang ha iba nga nasud ngan ginkuhaan hiya han swab sample hadton katapusan nga semana han Hulyo.
Kadungan hini, an Probinsya han Eastern Samar in nagmando han ira mga mulopyo nga deri la anay magbiyahe ngadto ha Palo, Leyte. Ini in katapos la kumpirmaron ni Palo Mayor Ann Petilla nga may natabo nga local transmission han virus ha iya munisipalidad.
Nagsering an LGU-Eastern Samar nga kun deri gud importante hin duro an toyo, kinahanglan deri pumakadto ha Palo. Kun hin-o man an pumakadto hini nga bungto ngan maglapos hin 24 oras an iya pag-istar ha Palo, kwarentina hiya hin duha ka semana pagbalik ha Eastern Samar.
Ha luyo nga bahin, alagid-agid nga mayda “fiesta lockdown” ha Palo tungod kay iginpahayag han PNP han bungto nga deri mapasakob hin bisan hin-o nga bisita ngadto han bungto ha kaadlawan han ira patron buwas, Agosto 6. Nag-implementar gihapon hin liquor ban tikang Agosto 5 tobtob Agosto 6.
Ngatanan han entry ngan exit points han bungto in bubutangan hin checkpoints basi waray makasulod nga manmamatron. Ini nga pitad in agud kalikyan an pagsarang han kagaw nga naha-una na nga ginpahayag ni Mayor Petilla nga nagkaada hin local transmission. #
