Isumat.com/3:09PM, August 4, 2020
Para han mga desidido ngan intresado pagpursige nga magin makarit nga coach ha basketball, dako hin duro nga prebilihiyo nga magpa-ilarum hin training kan Chot Reyes, an anay Head Coach han Gilas Pilipinas Basketball Team.
In inga talagsaon nga oportunidad in matatagamtaman ni Randylou Kenneth Corregidor, usa nga Taclobanon nga nakasentro an atensyon nga mapa-uswag pa an iya kina-adman komo magturutdo han basketball.
Ha deri pala maiha, hi Reyes in naglunsad han proyekto nga #Puso Para Sa Nagtuturo – A Coach Mentorship Outreach. Iginbuyagyag ni Reyes nga hadin nag-agi nga pira ka tuig, damo hin duro an hangyo ha iya tikang hin barubata nga mga coaches nga matutdu-an han pamaagi pagpa-dukwag han ira ablidad.
Hiningdan hini, hi Reyes in nagdesisyon nga magpipili hiya hin 12 nga mga coaches nga iya igpapa-ilarum hin espesyal ngan eksklusibo nga paghag-id. Igindig-on pa niya nga waray bayad an iya pagtutdo. Ginatos-gatos nga mga aplikante ha bug-os nga Pilipinas an nagsubmiter han ira mga papeles ngadto kan Reyes. Nagtalinguha hiya nga 12 gud la an iya pipili-on pero ha katapus-tapusan, 16 katawo an iya natudlok nga pagtututdu-an ngan usa na denhi hi Corregidor.
Tinikangan yana nga Agosto, magtitikang an klase han iya napili nga mga coaches ug an mga leksyon amo an masunod: player development, team building, skills training, practice planning, scouting, game preparation, defense and offensive systems, mental toughness, mastering resilience, ngan bisan ano nga igpapaki-ana han mga partisipante. Iya ini hihimoon dida hin walo nga virtual sessions.
Hi Corregidor in tim-os an pagpasalamat nga napili komo usa han mga partisipante han igpapa-angbit nga kina-adman han halkuag nga eksperiensya ni Reyes komo coach ha kolehiyo, PBA ngan national team, labot la nga usa hiya han mga de-kalibre nga motivational speakers han nasud.
Hi Corregidor in pira na ka tuig nga magturutdo han Tacloban Active Basketball Center, Inc. (TABCI) nga pinangungunahan ni Coach Noli Cabibihan. Ini an gisasyahani nga basketball clicnic ha Region 8 ngan kadam-an na han ira mga estudyante in nagin varsity players hin mga unibersidad ha Tacloban, Cebu ngan Manila.
Kaapi gihapon hi Corregidor han coaching staff han Team Pilipinas dida han Asia-Pacific Basketball Youth Cup nga gindumara ha Singapore. Nagin kaapi gihapon hiya han coaching staff han Atrchdiocese of Manila, San Carlos Seminary ngan Xavier Basketball Team sugad man an Team Pasaguino.
Nagin coach gihapon hiya han mga artista sugad kanda Vice Ganda ngan iba pa dida han Team Showtime.
Kaapi gihapon hiya han Technical Staff han Eastern Visayas Collegiate Athletic Association (EVCAA), an gisasyahani nga liga han mga kolehiyo para han sports ha Eastern Visayas. Aktibo nga miembro gihapon hi Randylou han Samahang Basketbol ng Pilipinas (SBP) – Eastern Visayas ha ilarum han pagdumara ni Coach Jerry Abuyabor.
Dida hini nga bag-o nga pag-ayat han iya abilidad, hi Corregfidor in nagseguro nga deri niya kakawangon an a talagsaon nga oportunidad nga iginhatag ha iya ni Reyes. Iya gihapon iginpasarig an pagpa-angbit han kina-adman nga iya ma-aangkon para han pagpa-uswag han basketball denhi ha Sinirangan Bisayas.
