Isumat.com/3:48AM, October 27, 2020
Iginkakabido han bug-os nga pwersa han PNP-Region 8 an pakalas ngan waray ha oras nga pagtalikod ha kadayunan ni Police Lt Christian Bolok, an hepe han San Jose, Northern Samar PNP Office.
Hi Bolok in namatay tungod han samad durot han tadi hin iburulang nga manok nga nakatusok han iya too nga hita han pagrondahon han iya grupo an iligal nga bulang o tupada ha Brgy Mandugang, San Jose kakulop han kulop.
Subay han report nga nahikay han Isumat.com, pasado ala 1 han kulop, Oktubre 26, nakakarawat hin impormasyon an kapulisan nga mayda nagtutupada ha mao nga barangay. Kasumpay hini, kadagmitan nga pumakadto han nasabi nga lugar an mga tinubyanan han balaud ngan na-aktuhan nira an burublang.
Ira ini ginronda ngan naka-aresto hin pira ka tawo upod na gihapon an pakakumpiskar han kwarta nga pusta, mga tadi ngan pito nga igburulang nga manok. Dida han karigumok tungod han pagronda, aksidente nga natusok hi Bolok han tadi nga nakataod pa ha usa nga manok.
Naigo an iya hita ngan tigda nagbudyarat an dugo tungod han hilarum nga kasamdan. Ha gilayon, gindara hiya ha Northern Samar Provincial Hospital ha Catarman nga porlomenos 40 kilometros an kahirayo tikang ha San Jose. An doktor didto han hospital an nagdeklarar nga Dead on Arrival an opisyal han PNP.
Hi Col Arnel Apud, Northern Samar PNP Director an nagpahayag han duro nga kabidu-an hini nga panhitabo. Sering niya, iya ginsasaluduhan an pag-alay ni Bolok han iya kinabuhi ha pagtuman han iya serbisyo. Ha luyo nga bahin, nakigsimpatiya gihapon an LGU-San Jose ha panguna ni Mayor Clarence Dato ngadto han pamilya han namatay nga opisyal.
Hi Bolok in 38-anyos ngan residente han Laoang, Northern Samar.
Nagkadadakop durante han ronda an mga suspetsado nga hira Dioscoro Grande, Rodolfo Moreno, Vicente Medice, Peter Anonuevo, Junior Romines ngan Renren Romines. Hira in mga residente han paghagrani nga mga barangay. Nakatalaan umatubang an mga suspetsado han mga kaso nga igsasalawad kontra ha ira.
Kun aton manunumduman, pira na ka bulan an nakalabay, an Provincial Government han Northern Samar in nagpagawas hin kamanduan nga nagdederi han pagpabulang ha mga gallera sugad man mga patupada ha bisan diin nga lugar basi kalikyan an pagtarampoog han katawhan nga usa han mga rasones han pagsarang han Covid-19. #
