Isumat.com/7:19AM, October 26, 2020
Katapos hin walo ka bulan ha Estados Unidos ngan duha ka semana nga kwarentina, igkaka-urusa na gihapon ni World Boxing Organization (WBO) super-bantamweight champion John Riel Casimero an iya pamilya ha Ormoc City.
Duha na ka semana an nakalabay han makabalik ha Ormoc hi Casimero tikang ha Amerika, pero tungod han Health Protocol han Covid-19, nagkwarentina hiya ha usa nga hotel didto han syudad ug yana nga adlaw an nakatalaan nga matatapos an iya kwarentina.
Nagpahayag hi Casimero nga duro na an iya kamingaw han iya pamilya, pero iya gud ginsunod an mga patakaran tungod han pandemya. Naibanan gihapon an iya kamingaw kay nakasiplat hiya han iya anak ngan oyab han pumasyada hira ngadto han hotel.
Hadton Pebrero 2020, lumakat ngadto ha Amerika an 30-anyos nga boksingero basi mag-ensayo para han Unification Bout kontra kan WBA king Naoya Inuoe han Japan. Pero nagka-uru-ugsod ini tungod han pandemya tobtob nga umabot an panahon nga umatras an kampo han Hapon tungod hin problema han visa.
Hinungdan hini, an promoter ni Casimero in namiling hin iba nga igkakapanta, sanglit han nag-agi nga bulan, iya iginkasurapo an challenger nga hi Duke Micah han Ghana kun diin iya ini ginpalunay ngan nakadaog an Ormocanon pinaagi hin 4th round Techinical Knockout.
Pero waray makuntento hi Casimero hini nga iya away, kay para ha iya pipitsugin la hi Micah ngan karuyag gud niya hi Inoue an igkakabalyu-ay hin bunal. Nagtatahap hi Casimero nga nagtatalaw ngan nahahadlok ha iya an Hapon sanglit damo na yana an mga rason basi la deri madayon an iya banggaay.
Usa han posible nga igka-asdangay ni Casimero amo hi Luis Nery han Mexico, nga amo an nagkakapot han WBC superbantamweight title. Nagsering hi John Riel nga an iya kampo ug an handlers han Mehikano in nag-iistorya na yana para han nasabi nga plano.
Hapagkayana, karuyag la anay matilawan ni Casimero an kamatam-is ngan kamakaruruyag nga sitwasyon nga igkaka-usa na niya an iya pamilya katapos hin hilawig nga panahon hin pagkaburublag.
Nagsering pa an boksidor nga bisan kun nakabakasyon hiya yana ngan may pandemya, igpapadayon niya an iya pagpakondisyon ha Ormoc City. #
