Isumat.com/Pebrero 2, 2022
Nahilaprak ha kamot han mga otoridad in usa nga Non-teaching personnel han Department of Education, usa nga empleyado hin LGU, ngan usa nga security guard ha magkalainlain nga anti-illegal drugs operation hadin nag-agi nga duha ka adlaw.
Ha report tikang ha PDEA-Region 8, nagdumara hin operasyon an ira mga operatiba pasado alas 6 han gab-i, Enero 31 ha Brgy Masagaosao, Kawayan, Biliran kun diin nadakop an suspetsado nga hi Maria Umpacan, 54 anyos, inasaw-an ngan Administrative Assistant II ha Deped.
Nakumpiskar tikang han suspetsado in duha ka sachet hin gintotoohan nga shabu balor hin 3500 pesos.
Mahugot naman nga igindiwara ni Umpacan nga tikang ha iya an nasabi nga droga. Sering niya, imposible nga mabuhat niya an iligal nga aktibidad kay empleyado hiya han DepEd ngan aktibo hiya han mga karigudigo ha singbahan.
Didto naman ha Naval, Biliran, an security guard nga hi Robelito Sereno, 44 anyos, an nakwelyuhan han mga kapulisan ha buy-bust operation nga natabo ha Brgy Agpangi alas 5 han maagahon, Pebrero 1, 2022.
Nakuha tikang han gintatahapan in tulo ka sachet hin gin-aalegar shabu kantidad hin 3500 pesos.
Samtang, an gintibhong nga pwersa han PDEA ngan Hilongos, Leyte PNP Station in nakadakop hin usa nga empleyado han munsipyo han mao nga bungto ha operasyon gindumara pasado alas 11 han aga ha Brgy Atabay
Nakuha tikang han suspetsado nga hi Alden Borces in duha ka sachet hin gin-aalegar shabu balor hin 1054 pesos.
Nagsering an mga otiridad nga an 24 anyos nga suspetsado in usa nga Target-Listed Drug Personality.
An mga nagkadadakop in nakapaslak na yana ha karsel ngan nakatalaan umatubang han mga kaso nga igsasalawad kontra ha ira. #
