Isumat.com/6:09AM, Pebrero 11, 2021
Magpapabilin nga suspendido an klase ngan trabaho ha pampubliko nga mga opisina ha Palo, Leyte tungod han epekto han pagbabaha han nag-agi nga adlaw.
Hi Mayor Ann Petilla in nagpagawas hin kamanduan nga tobtob Pebrero 11, waray la gihapon klase ngan trabaho ha ira bungto. Ini in tungod han grabe nga epekto han pira ka adlaw nga pag-uuran hinungdan han paglunop han baha ha porlomenos 22 nga barangay.
Partikular nga duro an baha ha barangay Kabarasan Guti ngan Caloogan kun diin haros abuton an atop han kabablayan. Iginpahayag pa ni Petilla nga damo gihapon nga parte han munisipalidad in nagpapabilin nga waray kuryente tobtob yana.
Iginsumat han alkalde nga an rason han pagbabaha ha ira bungto amo an paglapwas han tubig tikang ha Bangon River ha Sta Fe ug an Binahaan River ha Dagami. Tungod han pag-overflow han mao nga mga salog, waray na maka-akos an embankment nga amo unta an magpupugong han baha basi deri makasulod ha Palo.
Dida han inisyal nga report, maabot hin 3 Mil ka pamilya dida han bungto an apektado han pagbabaha. Kadam-an ha ira in nagbalhin ha mga evacuation centers, samtang an iba naman in pumakadto la anay ha hiruhitaas nga lugar. Waray pa pahayag tobtob yana kun pira an kantidad han danyos ha agrikultura dida han bungto.
Iginpatapod naman han LGU nga magpapadayon ngan bastante an mga hinabang nga ighahatag para han apektado nga mga residente.
Kasumpay hini, an LGU in nakatalaan maghimo hin mga pitad ha panayo nga deri na ma-utro ini nga pagbabaha, sering pa ni Petilla.
Iginreport naman nga na-recover na an patay nga lawas han ulitawohay nga gin-aalegar nalumos dida han baha ha Brgy Caloogan. Dida han initial investigation, ginkilala an 15-anyos nga biktima ha ngaran nga Ken Jamer.
Iginpahayag naman han Office of Civil Defense nga ira pa ginkukumpirmar kun an kamatay han biktima in tungod han natabo nga kalamidad. #
