Isumat.com/7:43AM, Pebrero 11, 2021
Mayda na liwat taga Sinirangan Bisayas nga maniningkamot pagdara hin onor para han rehiyon ha larangan han “Beauty and Brains.”
An taga Allen, N. Samar nga hi Czarina May Tomada in nagpasamwak pinaagi han iya social media post nga nagsubmiter na hiya hin aplikasyon basi maka-api han pa-isan-isan para han titulo nga Miss World Philippines 2021.
Nagsering an maanyag nga daraga nga an iya pakiglantugi ha Miss World-Phils in may panuyo nga igpabati an boses han mag-uuma. Iya gin-esplikar nga nakikig-usa hiya han sakripisyo hini nga sektor ngan iya igindig-on nga an kalibutan in nagkikinahanglan han mga mag-uuma.
Dida han report han Allen TV, hi Czarina in nakoronahan nga Miss Allen han 14-anyos pala hiya ngan nagin Miss Northern Samar han iya pag 16-anyos.
An iya iba nga mga Beauty Titles amo an masunod: Miss SCUAA Region 8, 2018; Miss AOG Region 8, 2017; ngan 2nd Runner-up Miss Teen Pintados, 2013.
Hi Tomada in naka-gradwar ha kurso nga Accountancy ha University of Eastern Philippines, Catarman, N. Samar.
An kompetisyon in pagdudumaraon hiton Mayo o Hunyo didto ha Manila ug an magdadaog amo an magdadara han bandera han Pilipinas durante han Miss World Competition. #
